Drama

Newydd weld cynhyrchiad Cwmni Theatr Cendelaethol Cymru o "Iesu".
Yn gyntaf 'dyw'r math yma o gynhyrchiad ddim yn addas i'w labelu'n "genedlaethol". Ysgol ddrama neu be' liciwch chi ond ddim cenedlaethol plis.
Fel ac y cafwyd yn y cynhyrchiad o Romeo a Jiwliet taflwyd pob dim i mewn i'r cynhyrchiad yma nes fod y cyfan yn un potes plwyfol. Un nodwedd amlwg o'r cynhyrchiad oedd fod y rhan fwyaf o'r actorion ar y llwyfan yn gwbl fud am y noson gyfan - felly fe gafwyd llawer o wgu, rhyfeddu, llawenhau, drysu, poeni ag ati - a'r cyfan yn ddieiriau!
Be' sy'n bod arnom ni Gymru fod arnom angen "ddrama fawr"? Dyna'r geiriau a welais i ddisgrifio hon - ond wir 'doedd hi ddim yn ymylu at fod yn fawr. 'Roedd y syniad tu ol i'r diweddglo yn un cwbl ddilys ond yn anffodus yn hytrach na canolbwyntio ar arwain y ddrama'n grefftus tua'i diweddglo heriol yr hyn a gafwyd oedd tipyn o ddramau festri capel wedi eu gludo at ei gilydd yn ddigon anghelfydd. Dafydd Dafis yn ddios oedd cawr y noson ac fe gariodd yr holl beth yn ei flaen gydag awdurdod. Noson i'w anghofio.

Tro trwstan

Dim ond wedi cychwyn cynnig sylwadau a dyma fi'n cael fy nharo'n wael ac yn cael fy nghludo i'r ysbyty! Cosb mae'n siwr medd rhai - dyna'i haeddiant. Ond nid dyna fy marn i!
Bellach dwi'n raddol dod at fy hun ac yn ail-afael ym mhethau'r byd hwn.
Gwyliwch hyn o wagle!

Chwarae gyda democratiaeth

Pa gymhwyster sydd ei angen arnoch i fod yn aelod effeithiol o'n Cynulliad Cenedlaethol?
Croen fath ag eliffant dybiwn i wrth ddarllen am yr hyn mae rhai aelodau yn ei hawlio fel costau byw! Tra bo sawl A.C. ddim yn hawlio'r un geiniog mae eraill yn hawlio miloedd o bunnoedd o ad-daliad am gostau byw yn y brif-ddinas.
“It’s in all our interests that nobody has any suspicion about what’s going on and democracy in Wales is seen to be clean and serene,” - geiriau Dafydd El yn ol icwales sydd i fod i dawelu ein amheuon. Wel dyma un sy'n credu fod y dyfroedd tua'r Cynulliad yna ymhell o fod yn "clear and serene!"

Rhannu

A pa ffordd gwell (i'm tyb i o leia)' na rhannu'r hyn sy'n dda - gan dynnu dy sylw i bedair llinell olaf cerdd y bardd o'r Flaenau Ffestiniog i Landdwyn.
Ble mae Llanddwyn? Rhaid teithio lan i'r Gog ac i Ynys Mon, ac wedi troi i'r chwith 'rôl croesi Pont Brittania ac yna troi i'r chwith yn Llanfairpwll (i gyfeiriad Brynsiencyn) rhaid dal ymlaen nes cyrraedd pentre bach Niwbwrch. Ar groesffordd y pentre hwn rhaid troi i'r chwith eto a dilyn y lon fach sy'n arwain i lawr drwy'r coed at y Maes Parcio. Yna gellid cyrchu am y traeth - troi i'r dde a crwydro yr "Ynys Llanddwyn" hynafol neu troi i'r chwith a mynd am dro hyd y traeth llydan (os yw'r llanw allan!) Paid synnu os weli di noethlymunwyr ar ddiwrnod braf yn torheulo neu'n nofio'n borcyn yn y dwr - mangre bendigedig. Ond mae Gwyn Thomas yn mynegi hyn yn well o lawer na minnau.

Llanddwyn addfwynaf,
Byd gwyn a hwyrddydd haf,
A dyn yn rhyw deimlo, rhwng awyr a thraeth,
Fod da o'i enedigaeth.

Ferragosto!

Pa adeg gwell na dydd gwyl ynghanol Awst i mi gychwyn rhannu a ti - annwyl ddarllennydd (neu chwithau darllenwyr!) ffrwyth fy myfyrdodau am agweddau o'r byd sydd ohoni. Cawn weld be fydd yn denu fy sylw!